Баянхонгор аймгийн Засаг дарга Г.Батжаргал өнөөдөр/2017.04.12/ Дэлхийн Эрүүл мэндийн байгууллагын Монгол дахь суурин төлөөлөгч, ноён Су Нюунт У-г тус аймагт ажиллах үеэр нь хүлээн авч уулзлаа.

 

ДЭМБ-ын суурин төлөөлөгчөөр ахлуулсан ажлын хэсэг энэ удаад төрөөс 2017 онд Эрүүл мэндийн талаар баримтлах бодлогын хүрээнд хэрэгжиж буй Дэд хөтөлбөрийн хэрэгжилттэй танилцах болон Эрүүл мэндийн мобайль төслийн ажлыг тус аймагт хэрэгжүүлэх тухай мэдээллийг өгөхөөр ажиллаж байна.

 

Баянхонгор аймагт төрөөс эрүүл мэндийн талаар баримтлах бодлогын хүрээнд хэрэгжиж буй Дэд хөтөлбөрийг боловсруулах ажлын хэсэг ажиллаж байгаа аж. Энэ цаг үед ДЭМБ-ын ажлын хэсэг ирсэнд олзуурхаж байгаагаа аймгийн Засаг дарга Г.Батжаргал илэрхийллээ. Тиймээс уг дэд хөтөлбөрийн боловсруулалтын шатанд зөвлөгөө өгөх боломж нээлттэйг цохон тэмдэглэв. Тэгвэл ноён Су Нюут У дэд хөтөлбөрөө англи хэл дээр орчуулахыг зөвлөлөө. Ингэснээр дэлхийн донор орон, хандивлагч байгууллагуудаас эрүүл мэндийн чиглэлийн төсөл, хөтөлбөрийг Баянхонгор аймагт татах бололцоо ДЭМБ-ын зүгээс нээлттэй гэдгийг хэллээ.Ноён Су Нюунт У “Монгол Улсын газар нутаг өргөн уудам. Улаанбаатараас аймгийн төвүүд, аймгийн төвөөс сумд, сумдаасаа хөдөөгийн малчид алслагдмал амьдарч байгаа нь эрүүл мэндийн анхан шатны тусламж, үйлчилгээг түргэн шуурхай хүргэхэд бэрхшээлтэй байсаар ирсэн. Тиймээс дэлхий нийтийн хэрэглээнд нэвтрээд таван жил болж буй эрүүл мэндийн мобайль төслийг Баянхонгор аймгийн Баянлиг суманд хэрэгжүүлэхээр сонгосон” гэв.

 

Эрүүл мэндийн мобайль төсөл хэрэгжсэнээр интернэтийн сүлжээ орсон алслагдмал бүс нутгаас тухайн өвчтөний талаарх мэдээллийг дараагийн шатлалын эмнэлгүүд рүү шуурхай дамжуулж, эмнэлгийн яаралтай тусламж үйлчилгээг оновчтой хүргэх боломж нээгдэх юм.  Өмнө уг төсөл Бууцагаас сумын 5 багт амжилттай хэрэгжсэн байдаг.

 

Баянлиг сум нь одоогийг байдлаар интернэтийн сүлжээгүй хоёр сумын нэг. Утсаар ярихын тулд сумын төвөөс 10 км явах шаардлагатай болдог. Энэ байдал нь төсөл хэрэгжихэд хүндрэл дагуулж буй. Тэгвэл аймгийн төсвөөс 60 сая төгрөгийн хөрөнгө оруулалт хийж ирэх тавдугаар сард Жи-мобайлийн сүлжээг тус суманд нэвтрүүлэхээр болжээ. Ингэнээр тус сумын хүн ам бүхий нутгийн 70 хувийг үүрэн телефон, интернэтийн 3G сүлжээгээр хангах юм. Мөн эрүүл мэндийн мобайль төсөл бодитоор хэрэгжинэ гэсэн үг. 2018 онд тус сумын бүх нутаг дэвсгэрт интернэтийн сүлжээ бүрэн нэтрэх аж.

 

Өвчин туссан хойно нь биш тусахаас нь өмнө оношилж, урьдчилан сэргийлэх арга хэмжээ авах нь хамгийн оновчтой гэдэг дээр талууд санал нэгдэв. Энэ хүрээнд Баянхонгор аймаг энэ жилээс эхлэн бүх сум, багт амьдарч буй иргэдийг эрүүл мэндийн үзлэг, шинжилгээнд бүрэн хамруулах зорилт тавьсан. Энэ хүрээнд эрүүл мэндийн үзлэг, оношлогоонд хамрагдаас зориуд зайлсхийдэг нийгмийн бүлгийг албадан хамруулах хүртэл арга хэмжээ авч ажиллахаар болсноо ДЭМБ-ын суурин төлөөлөгчид илэрхийллээ.

 

ДЭМБ-ын суурин төлөөлөгч, ноён Су Нюут У нь Монгол Улсад 2013 онд ирж байсан бол Баянхонгор аймагт хоёр дахь удаагаа ажиллаж байна. Тэрээр ирэх тавдугаар сард үүрэгт ажлаасаа чөлөөлөгдөж байгаа боловч хувийн туршлага, Олон Улс дахь байр сууринаас Монгол Улстай эрүүл мэндийн чиглэлээр хамтарч ажиллах тухайгаа хэлэв. Тэр дундаа Баянхонгор аймагтай хамтын ажиллагаагаа өргөжүүлэх сонирхол өндөр байгаагаа илэрхийлж байлаа.