Нутгийн өөрөө удирдах байгууллагын 25 жил, аймгийн ардын депутатуудын хурал түүний гүйцэтгэх захиргаа, аймгийн ИТХ, ЗДТГ-ийн 75 жилийн ойг тохиолдуулан нийт төрийн албаны удирдах албан тушаалтнууд аймгийн хэмжээнд гэр худалдан авах чадваргүй, халамж анхаарал шаардлагатай гэр бүлүүдийг ханат цагаан өргөө гэрээр хангах үйлсэд нэгдсэн юм.

Энэ ажлын хүрээнд гэр хүссэн 50 гаруй иргэдийн өргөдөл аймгийн Засаг даргад хаяглагдаж ирсэн ба холбогдох ажлын хэсгийхэн судалгаа явуулж өргөдөл ирүүлсэн айл нэг бүрээр орж бодит байдалтай нь танилцаж ажиллажээ. Тус ажлын хэсгийхний хийсэн судалгаа тайланг өнөөдөр аймгийн Засаг дарга болон ЗДТГ-ын удирдлагууд авч хэлэлцэн улмаар нэн шаардлагатай, цаашид орон гэрээ өөд нь татаад аваад явчих боломжтой гэж үзсэн 38 өрхийг сонгож гэртэй болгохоор шийдвэрлэлээ.