Төрийн үйлчилгээг багийн иргэд нийтэд хүргэхэд дан сэтгэл байгаад дэмжлэг байхгүй бол үр дүн гарахгүй. Иймээс Баянхонгор сумын Засаг дарга Ж.Мөнхсоёл аймгийн төвиин багуудын ажлын аппаратуудын ажлын бүтээмж, чанар, хурдыг илүү сайжруулах үүднээс төрийн үйлчилгээний автомашинтай болгох саналаа аймгийн ИТХ, Засаг даргад танилцуулан улмаар 2018 оны үндсэн чиглэлд тусгуулжээ.

Ингэснээр орон нутгийн төсвийн 69 сая төгрөгийн хөрөнгө оруулалтаар 9 багийн төвийн ажлын аппаратыг төрийн үйлчилгээний автомашинтай болгож өнөөдөр түлхүүрийг алд цэнхэр хадгийн хамтаар албан ёсоор гардуулж өглөө.

Мөн 150-200 метрийн радиуст тусах чадал бүхий чанга яригчийг энэ үеэр багийн дарга нарт сумын тамгын газраас олголоо.

Тус олгосон төрийн үйлчилгээний автомашиныг хувийн ажил ахуйдаа ашиглахгүй байх тал дээр нэгдсэн хяналтыг сумын тамгын газраас багийн дарга нарт тавих ба цаашдаа машинд жи пи эс төхөөрөмж суулгахаар төлөвлөөд байгаа юм байна.

Иргэдэд зарлал мэдээлэл хүргэх болон айл өрх бүрт шуурхай хүрч ажиллахад ажлын нөхцөл байдлаа сайжруулсандаа багийн дарга нар баяртай байна.