Их Зохиолч, найрагч  Ч. Лхамсүрэн агсаны гэргий Монголын саран, наран эх, эхийн алдрын 1, 2-р одонт Боловсролын тэргүүний ажилтан Сандагийн Цэндсүрэн гуай Эрдэнэт хотод  өнтэй сайхан өвөлжиж,  амар амгалан амьдарч байгаад тэнгэрт хальжээ.  Түүний гэр бүл үр хүүхдүүдэд эмгэнэл илэрхийлье.

Тэрбээр 1927 онд Төв аймгийн Баянцогт сумын нутагт төрсөн байдаг. Найман сайхан хүүхдийн эх, дөрвөн үеээ харж халамжлан хүмүүжүүлж явсан тэрээр  Монголын ирээдүй болсон хүүхдийн байгууллагад насаараа ажилласан өндөр ижий юм.  Суут их найрагчийн маань  эрхэм бүтээл туурвилын онгод хийморь, амьд гэрч нь болсон тэрээр Баацагаан сумын Хүндэт иргэн бөгөөд 2017 онд их найрагчаа хүндэтгэн Баянхонгор аймгаас зохион байгуулсан зуун жилийн ойдоо  ханийн хувиар сэтгэл өндөр оролцож байсныг бид дурсан санаж байна. 

Тэрээр  даруу төлөв, хүнлэг ухаалаг өв тэгш байдлаа  монголын мянга мянган хүүхэд залуучуудад өвлүүлэн үлдээсэн их хайр хүндлэлийн эзэн байлаа . Хонгор сайхан нутгаас төрөн гарсан их найрагчтай маань амьдралаа салшгүй холбосон таны үйлс мөр үнэн цагаан байсанд бид ямагт бахархдаг билээ.  

 

                                                                     Ум сайн амгалан болтугай

 

 

                                                                  Баянхонгор аймгийн ИТХ, ЗДТГ