Хүүхэд шуугисан өргөөний их эзэд нээлтийн үйл ажиллагаагаа өргөн дэлгэр хийсэн юм.

Ёслолын эхэнд Монгол улсын төрийн далбаа болон олимпын далбааг заалны хоймортоо залсанаар үйл ажиллагаа албан ёсоор эхэллээ. Тив, улс, аймгийн тэмцээнд амжилттай оролцсон хүүхэд багачуудын жагсаал нээлтэд оролцогсодын баяр талархалыг хүлээж байсан юм.

40 гаруй жилийн хугацаанд зориулалтын бус жижиг зааланд биеийн тамир, хүмүүжлийн арга хэмжээг нэн хүндрэлтэйгээр явуулж байсан үе үеийн багш ажилчид гэлтгүй тус сургуулийн хүүхэд багачууд энэ өдөр баяр хөөр дүүрэн байна.

Баянхонгор аймгаас сонгогдсон УИХ-ын гишүүдийн зөвлөх З.Төмөртөмөө, Р.Амарбаясгалан нарын үе тэнгийн найзууд тус сургуулийн 2005 оны төгсөгч нар бөгөөд төрөлх сургуулиа ийнхүү зориулалтын спорт заалтай болж байгаад баяр хүргэн заалны тохижилтод зориулан нэг сая төгрөг хандивлав.

Аймаг орон нутгийн төрийн байгууллагын үйл ажиллагааг стандарт нөхцөлд аваачих гэсэн бодлого, М.Билэгт нарын улсын их хурлын гишүүдийн дэмжлэгтэйгээр өнөөдөр тус сургууль улсын төсвийн 936,5 сая төгрөгийн санхүүжилтээр зориулалтын стандарт спорт заалтай болж байгаа юм. Тус спорт заалыг “Эрч хүч хөгжил” ХХК өнгөрөгч 06-р сараас барьж эхлэн өнөөдөр байнгын ашиглалтад ийнхүү хүлээлгэж өглөө.

Нийт 38,4 х 24-ийн харьцаатай, том заал болон дотроо багш сурагчдын тус тусын кабинет, уншлагын танхим зэргийг багтаасан 6 өрөөтэйгөөр зохион байгуулалтыг хийжээ.

Тус сургуулийн захиргаа болон төгсөгч нараас спорт заалныхаа нээлтэд зориулж 5 сая төгрөгийн шагналын сантай гар бөмбөгийн тэмцээнийг мөн явуулж байна.

Эрдмийн их өргөөний эзэддээ спортын өндөр амжилт хүсье