Мал аж ахуйн өвөлжилт, цаашид гарч болох эрсдлээс урьдчилан сэргийлэх, малчин түмэндээ сэтгэлийн дэм өгөх  зорилгоор аймгийн Засаг дарга Д.Мөнхсайхан  “Төл малыг бүх нийтээрээ тэжээе" уриалга гаргалаа. Тэрээр шинэ оны босгон дээр буюу 12 сарын 30-ны өдөр аймгийн төвийн төрийн байгууллагын удирдлагуудтай уулзаж дээрх уриалгаа танилцуулсан юм.

Нүүдэлчдийн соёл ахуйг хадгалж яваа малчдадаа туслах, онд ороход хүндрэлтэй төл малаа гарз багатай авч үлдэх уриалгыг уулзалтад оролцогчид 100 хувь дэмжлээ.  Ингэснээр Баянхонгор аймаг 20 мянган төл малыг төв суурин газартаа тэжээхээр нэгдэв. Эдгээрийн 10 мянган төл малыг төр болон бизнесийн байгууллагууд өөрсдийн нөөцдөө тулгуурлах тэжээх бол бусад сум суурин газарт үлдсэн тал хувийг тэжээхээр төлөвлөлөө.

Төл малыг тэжээх аргачлалын талаар ХХААГ, МЭА, Мал үржлийн тасгаас шаардлагатай арга зүйгээр байгууллагуудыг ханган ажиллах юм.