Өнөөдрөөс эхлэн Баянхонгор аймгийн Засаг даргын Тамгын газрын алба хаагчид өдөр бүрийн 11.00 цагаас ажлын байран дээрээ дасгал хийж эхэллээ. Ажилтан, албан хаагчдын ажиллах орчин нөхцөлийг сайжруулах, анхаарал халамж тавих, дархлааг дэмжих нь Коронавируст халдварт өртөх эрсдэлийг бууруулна гэж эрүүл мэндийн байгууллагаас зөвлөж буй.

Тиймээс ч аймгийн ЗДТГазар албан хаагчдын биеийн халууныг өглөө бүр  үзэж, амны хаалттай ажиллахыг сануулан,  спиртэн суурьтай гар халдваргүйжүүлэгчийг давхар бүрт болон ариун цэврийн өрөөнд байрлуулж хэвшжээ.

Ажлын байран дээр сунгалт болон амьсгалын дасгал хөдөлгөөнийг тогтмол хийснээр дараах давуу талууд үүснэ.

1. Байгууллагын бүх ажилтнууд нэг зүйлийг багаараа тогтмол хийснээр аливаа ажлыг нэгдэж хийх дадал зуршлыг нэмэгдүүлэхэд дэмжлэг болдог.
2. Эрүүл мэндийг дэмжих, хөдөлмөрийн явцад бий болсон ядралаас сэргээх, ажлын чадварыг нэмэгдүүлэн улмаар хөдөлмөрийн бүтээмжийг дээшлүүлэх ач холбогдолтой.
3. Сунгалтын дасгал хөдөлгөөнийг хийснээр судасны уян хатан байдал нэмэгдэж, улмаар цусны эргэлт сайжран, биеийн уян хатан байдал дээшилнэ.
4. Хүний биеийн тунгалгийн системийн үйл ажиллагаа сайжирснаар биед хуримтлагдсан хорт бодисуудыг шүүж гадагшлуулна.
5. Амьсгалын дасгалыг зөв хийснээр биеийн цусан дахь хүчилтөрөгчийн хэмжээг нэмэгдүүлж, зүрх судасны үйл ажиллагааг дэмжихээс гадна стрессийг бууруулж өгдөг.