Баянхонгор аймгийн боловсролын салбарт MNS ISO21001:2021 буюу Боловсролын байгууллагын менежментийн тогтолцооны стандартыг нэвтрүүлэх зорилгоор Эрдэм, Эрдэнэмандал, Соогоо Сейкео, Номгон, Баян-Ойт зэрэг таван сургуулийн нийт 38 багш, удирдах ажилтан хоёр өдрийн сургалтад хамрагдаж байна.

Энэхүү сургалтын гол зорилго нь боловсролын байгууллагуудын үйл ажиллагааг олон улсын жишигт нийцүүлэн сайжруулах, чанарын баталгаажуулалт авах суурийг тавих юм. Сургалтад оролцогчид ISO21001:2018 стандартын ач холбогдол, шаардлагуудтай танилцаж, тэдгээрийг бодит ажил хэрэг болгох аргачлалд суралцана.

Сургалтыг менежментийн стандартын зөвлөх, тэргүүлэх аудитор Ш.Соёлзул “Байгууллагын төлөв байдал”, “Манлайлал”, “Төлөвлөлт”, “Гүйцэтгэлийн үнэлгээ” зэрэг үндсэн сэдвүүдийн хүрээнд удирдан явуулж байна.

Сургалтын үйл явцтай аймгийн Засаг даргын орлогч М.Наранбаяр, Боловсролын газрын дарга Л.Аюурзана нар танилцан, баяр хүргэж, амжилт хүслээ.

Энэхүү стандартыг нэвтрүүлснээр Баянхонгор аймгийн боловсролын байгууллагууд үйл ажиллагаагаа тогтмол сайжруулж, боловсролын үйлчилгээний чанарыг шинэ шатанд гаргах чухал алхам болох юм.