БАЯНХОНГОР, АРХАНГАЙ, ӨВӨРХАНГАЙ АЙМГУУД ХАМТРАН "БАГШ, СУРАГЧ СОЛИЛЦОО" ХӨТӨЛБӨРИЙГ ХЭРЭГЖҮҮЛЖ БАЙНА

Хүүхдийн хөгжих, оролцох нөхцөл боломжийг нэмэгдүүлэх, сургууль орон нутгийн соёл, онцлогтой танилцаж бусдаас суралцах, үе тэнгийн найз нөхөдтэйгөө үзэл бодлоо солилцох, харилцан туршлага судлах, бүсчилсэн хөгжлийн үзэл баримтлалыг хөгжүүлэх зорилгоор Архангай, Баянхонгор, Өвөрхангай аймгуудын Хүүхэд, гэр бүлийн хөгжил, хамгааллын газар, Боловсролын газраас хамтран хэрэгжүүлж буй "Багш, сурагч солилцоо" хөтөлбөр хэрэгжиж эхэллээ.

Хөтөлбөрийн хүрээнд Архангай, Өвөрхангай аймгаас хүрэлцэн ирсэн 2 багш, 16 сурагчийг Баянхонгор аймгийн Засаг дарга Э.Энхбат өнөөдөр /2026.03.16/ хүлээн авч уулзлаа.

Засаг дарга Э.Энхбат, гурван бүс нутгийн онцлог, хөгжил дэвшил, амжилт бүтээл, авч хэрэгжүүлж буй арга хэмжээнийхээ тухайд Архангай, Өвөрхангайн сурагчдад мэдээлэл өгөөд Хонгор нутгийн хүүхэд багачуудтай нөхөрсөг сайхан дурсамж бүтээж, хэзээ ч хэнээс ч ичиж эмээлгүйгээр сониуч байж, мэдэхгүйгээ мэдэхийн төлөө, мэдсэнээ улам батжуулж эрдэм номд шамдан суралцан, их амжилтад хүрэхийг сурагчдад захив.

Архангай, Өвөрхангай аймгийн сурагчид спортын төрөлжсөн сургалттай “Эрдэнэмандал” сургууль, “Гэгээн сумади” сургууль цэцэрлэгийн цогцолборт тус тус суралцаж байна.

Хөтөлбөрийн оролцогч багш, сурагчид эрдэм мэдлэг, урлаг, спортын олон талт арга хэмжээнд оролцох бөгөөд багш сурагчид, боловсролын байгууллагууд туршлага солилцох, тэдний хөгжил оролцоог дэмжихэд багш, сурагч солилцоо чухал ач холбогдолтой юм.