Засгийн газрын Хэрэг эрхлэх газраас Монгол Улсын Ерөнхий сайд Н.Учрал, Засгийн газрын гишүүд болон холбогдох байгууллагын удирдлагуудын оролцоотойгоор өвөлжилтийн бэлтгэл хангах асуудлаар цахим хурал зохион байгууллаа.

Хурлаар улс, орон нутгийн хэмжээнд өвөлжилтийн бэлтгэл ажлыг эрчимжүүлэх, өвс, тэжээл, шатахуун, хүнсний стратегийн нөөцийг бүрдүүлэх, салбар хоорондын уялдаа холбоог сайжруулах, цаг агаарын хүндрэл болон болзошгүй эрсдэлээс урьдчилан сэргийлэх чиглэлээр авч хэрэгжүүлэх арга хэмжээг хэлэлцэн, холбогдох үүрэг чиглэлийг өглөө.

Монгол Улсын Ерөнхий сайд Н.Учрал аймаг, нийслэлийн дулааны цахилгаан станцуудын засвар, шинэчлэлийн ажлыг энэ оны 9 дүгээр сарын 1-ний өдрийн дотор бүрэн дуусгаж, өвөлжилтийн үед шаардагдах түлш, шатахуун болон бусад нөөцийн бүрдүүлэлтийг бүрэн хангахыг үүрэг болголоо.

Мөн отроор нүүдэллэж буй малчдад харьяалал үл харгалзан эрүүл мэндийн тусламж, үйлчилгээг шуурхай, хүртээмжтэй хүргэх, өвөлжилтийн бэлтгэл, бэлэн байдлын хэрэгжилтэд тогтмол хяналт тавьж ажиллахыг 21 аймаг, 9 дүүргийн удирдлагууд болон холбогдох байгууллагын удирдлагуудад үүрэг болгож, өвөлжилтийн бэлтгэлийг хугацаанд нь чанартай ханган ажиллахыг үүрэг болгов.