Нээлтийн арга хэмжээнд тус байгууллагад үе үед ажиллаж хөдөлмөрлөж байсан ахмад буурлууд, хүүхэд багачууд болон тус сургуультай ажил амьдралаараа холбогдсон хүндэт зочид оролцсон юм.

Тус цогцолборын захирал АБТА, МУ-ын шилдэг захирал Л.Аюурзана ойг нээж үг хэлэхдээ энэ цэцэрлэг сургуулиас өсөж өндийсөн бүхэн өөдрөг сайн явдаг. Энэ нь ахмад үеийн маань суурийг нь сайтар тавьж өгсөн ажил хөдөлмөр, хичээл зүтгэл, хайр энэрэлтэй нь холбоо байх. Тиймээс ч энэ буянт сайхан буурлууддаа талархалаа дэвшүүлж байна гэлээ.

Баянхонгор аймгийн боловсрол хүмүүжлийн салбарт тодорхой үр дүнтэй ажилласаар ирсэн тус хамт олны 70 жилийн ойн нээлтэд Ардын уран зохиолч Тангадын Галсан, аймгийн ИТХ-ын дарга Ц.Отгонбаяр, ЗДТГ-ын НБХ-ийн дарга Л.Баясгалангомбо, Баянхонгор сумын Засаг дарга бөгөөд хотын захирагч Ж.Мөнхсоёл, БСУГ-ын холбогдох удирдлага, мэргэжилтнүүд оролцож баяр хүргэж үг хэллээ.

Нэгэнт Хүүхдийн байгууллагын 70 жилийн түүх хойно зохион байгуулагчдын зүгээс хүүхдийн оролцооны олон тэмцээн уралдааныг энэ ойгоороо хийхийг зорьжээ. Тухайлбал цэцэрлэгийн хүүхдийн Уран хөдөлгөөнт гимнастикийн хотын аварга шалгаруулах, бага насны хүүхдийн үндэсний бөхийн барилдаан зэргийг явуулж, эргэн дурсахуй уулзалт хийх юм байна.

Баян-Ойт цогцолборын 70 жилийн ойн баярын хүрэл хүндэтгэлийн концерт 05-р сарын 26-ны 14:00 цагаас болох юм байна.

Хүн байхын утга учир, боловсрол хүмүүжлийн суурь үндсийг хонгор нутагтаа чанартай олгож буй тус хамт олонд түүхт 70 жилийн ойн мэндийг дахин дэвшүүлье.