Аяны нээлтийн хүрээнд бүх нийтийн эрүүл мэндийн урьдчилан сэргийлэх үзлэг шинжилгээг аймгийн НЭ-ийн 100 орчим эмч сувилагч нар гардан явуулж, ЭМГ-ын мэргэжилтнүүд хөтөч, зөвлөхийн үүрэг хүлээн ажиллаж байна. Энэ үеэр ард иргэдийн дунд зонхилон тохиолдох 6 төрлийн өвчний үзлэг шинжилгээг ямар ч үнэ төлбөргүй явуулж байгаа юм.

Баянхонгор аймгийн хувьд эрүүл мэндийн статистик үзүүлэлтээрээ сүүлийн жилүүдэд халдварт өвчний тархалт буурахгүй өсөх хандлагатай байгаа нь хүн амын дунд тулгамдсан асуудлын нэг болоод байгаа юм. Иймээс уг асуудлыг бодлогын түвшинд анхаарч зөв оновчтой байдлаар нэгдсэн ажил арга хэмжээг зохион байгуулах нь зүйтэй гэж аймгийн удирдлагууд үзжээ. Тус аянд Баянхонгор аймгийн 18-65, 65-аас дээш насны иргэд хамрагдах ба эрүүл мэндийн даатгал төлсөн эсхээс үл хамаарч бүх иргэдийг үзлэг оношлогоо, эмчилгээнд хамруулах зорилго тавижээ.

Өнөөгийн байдлаар 13,000 хүн эрүүл мэндийн даатгал төлдөггүй үүнээсээ шалтгаалж үзлэг оношлогоо, эмчилгээнд дийлэнхдээ хамрагддаггүй гэсэн судалгаа гарчээ. Аяны хүрээнд эдгээр 13,000 иргэдийн үзлэг, оношлогоо, эмчилгээний төлбөр, багаж тоног төхөөрөмжийн үнэ өртгийг аймаг орон нутгаас тодруулбал эрүүл мэндийн даатгалын сан, орон нутгийн төсвийн хөрөнгөөс санхүүжүүлэн явуулах ба эдгээр 13,000 иргэнрүү буюу зорилтот бүлэгрүү түлхүү чиглэгдэж үйл ажиллагаа явуулахаар төлөвлөжээ.

Төрөөс их хэмжээний зардал болгож иргэдийнхээ эрүүл мэндийн төлөө хийж буй энэ ажил арга хэмжээнд оролцолгүй хоцрогдсон иргэдийг цагдаагийн байгууллагаар албадан авчруулж үзэж оношлох ба хэрэв өвчтэй нь тогтоогдвол тухайн иргэн зардлаа өөрөө хариуцаж заавал эмчлүүлэх шаардлагыг тавьж байгаа юм байна.

Тухайлбал бэлгийн замын өвчлөлөөр сүүлийн жилүүдэд улсын дунджаас дээгүүр үзүүлэлтийг манай аймаг байнга үзүүлдэг. Сүрьеэ өвчиний гаралтын хувь өндөртэй байна. Энэ нь илрүүлэг нэг талдаа сайн байгааг харуулж байгаа ч нөгөө талдаа өвчлөл буурахгүй байгааг харуулсаар байгаа юм.

Иймээс иргэн та энэ аянд идэвхтэй нэгдэж, үзлэг шинжилгээ оношлогоондоо цаг хугацаа алдалгүй, үнэ төлбөргүй түргэн шуурхай хамрагдан өөрийнхөө болон гэр бүлийнхээ эрүүл мэндэд нэг удаа онцгой анхаарахыг уриалж байна.