(2021.03.19)  Аймгийн нийт нутгаар энэ сарын 20, 21-ний өдрүүдэд цас орж, салхи секундэд 15-17 метр хүрч ширүүсэн, шороон шуурга шуурахыг аймгийн ОБГ-аас анхаарууллаа.

Цасан шуурганы үеэр авто зам, даваа цасанд хаагдах, халтиргаа гулгаа үүсэж, мал аж ахуйн салбарт хүндрэл учирч болзошгүй байгааг мөн сануулав. 

Тиймээс хүчтэй салхи шуурганы үеэр иргэд, тээврийн хэрэгслийн жолооч нар хол, ойрын замд зорчихгүй байх, шаардлагатай тохиолдолд машин, техникийн бүрэн бүтэн байдал, шатахууны нөөцтэй байхыг зөвлөлөө. Мөн бага насны хүүхэд, өндөр настан болон хөгжлийн бэрхшээлтэй иргэдийг харгалзах хүнгүйгээр үлдээхгүй байх, мал бүхий иргэд, малчид эдгээр өдрүүдэд малаа бэлчээрлүүлэхгүй байхыг анхааруулсан юм.

Түүнээс гадна бага насны хүүхдийг малд явуулахгүй байх, малын хашаа, хороогоо дулаалах, гэр орноо салхи, шуурганаас хамгаалах зэрэг хувийн бэлтгэлээ хангаж болзошгүй эрсдэлээс урьдчилан сэрэмжлүүллээ.