ТЭТГЭЛЭГТ ШАЛГАРСАН ОРОН НУТГИЙН “SASA” АКТИВИСТУУДЫН БАГТАЙ ГЭРЭЭ БАЙГУУЛЛАА

136 ХҮН ҮЗСЭН БАЙНА

(2021.08.04) Орон нутгийн активистуудыг дэмжих зорилгоор “Охид эмэгтэйчүүдийг хүчирхийллээс урьдчилан сэргийлэх, ахуйн хүрээний архидалтыг бууруулах, таслан зогсооход “SASA” аргачлалыг нэвтрүүлэх” тэтгэлэг олгох уралдаанд шалгарсан “PFT” (Police, Family, Temujin) багийн ахлагч Г.Анхбаяр, “Хамтдаа” багийн ахлагч н.Азжаргал нартай гэрээ байгуулах арга хэмжээ өнөөдөр (2021.08.04) боллоо. Гэрээг Тамгын газрын даргын албан үүргийг түр орлон гүйцэтгэгч Д.Энхжаргал байгуулав.

НҮБ-ын Хүүхдийн сантай хамтран хэрэгжүүлж буй “Хүүхдэд ээлтэй орон нутаг” хөтөлбөрийн хүрээнд нөлөөллийн ажлыг хийхээр шалгарсан төслүүд нь энэ оны 8 дугаар сарын нэгнээс 10 дугаар сарын 20 хүртэл хоёр үе шаттай хэрэгжинэ. Санхүүжилтийн хувьд шалгарсан баг тус бүрт 5000000 (таван сая) төгрөгийн тэтгэлэг олгох аж.

Тодруулахад, Баянхонгор аймгийн ЗДТГазар 2017 оноос НҮБ-ын Хүүхдийн сантай хамтран “Хүүхдэд ээлтэй орон нутаг” дэд хөтөлбөрийг батлан амжилттай хэрэгжүүлээд байна. Энэ хүрээнд Засаглал, Хүүхэд хамгааллын чиглэлээр ажиллах 30 активистыг 2021 оны 06 дугаар сард “Жендэрт суурилсан хүчирхийллээс урьдчилан сэргийлэх, таслан зогсооход хамт олныг дайчлах SASA аргачлалын сургалт”-нд хамруулан бэлтгэсэн юм.

#SASA_активист_Баянхонгор

Ташрамд, SASA аргачлал гэж юуг хэлдэг талаар бэлтгэсэн мэдээллийг уншиж танилцана уу.

SASA! нь Жендэрт суурилсан хүчирхийллээс урьдчилан сэргийлэхэд нийгэм, хамт олныг дайчлах, олон нийтийн оролцоог үр дүнтэйгээр дэмжих, ингэхдээ хүчирхийллийн суурь шалтгаан болох эмэгтэйчүүд, эрэгтэйчүүдийн эрх мэдлийн тэгш бус байдлыг өөрчлөхөд тууштай анхаарч, хүний эрхэд суурилсан аргазүй, хандлагаар ажиллах цогц, бөгөөд энгийн аргачлал юм.

SASA! Аргачлалыг анх Уганда улс төдийгүй, Зүүн өмнөд Африкийн бүс нутгийн хэмжээнд хүүхэд, эмэгтэйчүүдийн эсрэг хүчирхийллээс урьдчилан сэргийлэх чиглэлээр ажилладаг Raising Voices буюу “Дуу хоолойгоо өргөх нь” нэртэй Угандагийн ТББ, уг ТББ-ын Эмэгтэйчүүдийн эсрэг хүчирхийллээс урьдчилан сэргийлэх асуудлыг хариуцсан захирал Лори Мишу өөрийн болон түншлэгч байгууллагуудынхаа олон жилийн туршлагад суурилан боловсруулсан юм.

SASA! Аргачлал нь хэдийгээр ЖСХ-ээс урьдчилан сэргийлэхэд чиглэгдсэн ч хүний эрхийн түгээмэл зарчимд суурилсан маш уян хатан, ашиглахад хялбар, энгийн ойлгомжтой маягаар зохиогдсон.

Зорилтууд:

• Эрх мэдлийн тэгш бус байдал, хүчирхийллийг дэмжин тэтгэдэг хэвшмэл ойлголт, соёлын сөрөг хэм хэмжээг өөрчлөх замаар жендэрт суурилсан хүчирхийллийг таслан зогсооход хувь нэмрээ оруулах;

• Эмэгтэйчүүдийн эсрэг хүчирхийллээс урьдчилан сэргийлэх үндэсний чадавхийг бэхжүүлэх:

Сургалтын онцлог:

• SASA! бол эрх мэдлийн талаарх эргэцүүлэл

• SASA! бол хүний эрх, ялангуяа эмэгтэйчүүдийн эрхэд суурилсан аргачлал

• SASA! хүчирхийллийн эсрэг дугарч эхлэхийг санал болгодог

• SASA! бол активистуудад зориулагдсан

• SASA! дотоод сэтгэлийг хөнддөг, мөн проактив

• SASA! нийгэм, хамт олны хэм хэмжээг өөрчлөхийг зорьдог

• SASA! нийгэм, хамт олныг дайчилдаг

• SASA! эрх мэдлийн тухай тогтсон хэм хэмжээг өөрчлөхөд нөлөөлдөг

• SASA! өөрчлөлтийн давуу талыг чухалчилж үздэг

2021-08-10 09:27:04

Жиргэх Хуваалцах

	Засаг Даргын Тамгын Газар, Төрийн Байгууллагын Ордон, Баянхонгор аймаг, Монгол улс
	70440001, 70442616, 80316771
	info@bayanhongor.gov.mn