Өчигдрөөс (08.17) нэгдүгээр ангид суралцах хүүхдийн элсэлтийг эцэг эхэд зориулсан parent.edu.mn системийн тусламжтай улсын хэмжээнд цахимаар эхлүүлсэн. Бүртгэлийн эхний өдөр ачаалал их байсантай холбоотойгоор систем гацаж хүндрэл учирсан. Энэ байдал өнөөдрөөс хэвийн болж байна.

 

Энэ хичээлийн жилд суралцах 6 настай буюу 2021 оны 01.01-нээс 12.31-ний хооронд төрсөнөөс бусад тохиолдолд цахим бүртгэл баталгаажуулахгүй юм. Жишээлбэл, таны бүртгүүлэх хүүхэд 2014 онд төрсөн бол программ алдаа заана. Энэ тохиолдолд эцэг эх, асран хамгаалагч та бүхэн хамран сургах тойргийн сургуулийнхаа албанд биеэр очиж бүртгэлээ шийдүүлэх шаардлагатай.

 

Хамран сургах тойргийн мэдээлэл нь www.parent.edu.mn систем дээр та бүхний Улсын бүртгэлийн газар дахь хаягийн дагуу хуваарилж өгнө. Жишээ: Та Бууцагаан суманд бүртгэлтэй атлаа аймгийн төв Баянхонгор хотод амьдарч ажилладаг. Нэгдүгээр ангид элсэн суралцах хүүхдээ одоо байгаа газрынхаа сургуульд бүртгүүлэх хүсэлтэй бол заавал хаягийн шилжилт хөдөлгөөнөө шинэчлэн хийлгэх шаардлагатайг анхааруулъя.

 

Наймдугаар сарын 16-ны 09:00 цагаас элсэгчдийн бүртгэл www.parent.edu.mn систем дээр нээлттэй болсон. Эцэг эхчүүд тухайн систем рүү ороод хүүхдийнхээ бүртгэлийг баталгаажуулахдаа зааврын дагуу регистрийн дугаарыг хийхэд танай хүүхэд энэ сургуульд орох боломжтой, та зөвшөөрч байна уу, баталгаажуулах уу гэдэг мэдээлэл гарч ирж байгаа. Эцэг эхчүүд энэ дагуу мэдээллийг баталгаажуулах юм. Энэ баталгаажуулах хугацаа наймдугаар сарын 16-наас наймдугаар сарын 25-ны 17:00 цаг хүртэл байна.

Сургуулиуд үүний дараа анги бүлэгт хуваарилах ажлаа хийнэ. Энэ ажил наймдугаар сарын 26-30-ны хооронд хийгдэнэ. Анги бүлэгт хүүхдүүд хуваарилагдаад эхлэнгүүт хүүхдийнхээ мэдээллийг баталгаажуулах үед бүртгүүлсэн утасны дугаарын дагуу танай хүүхэд ямар сургуулийн ямар бүлэгт хэн багшийн ангид орсон талаарх мэдээлэл очно.

Бүртгэлийн хэлбэрийн хувьд parent.edu.mn үндсэн систем, ESIS мобайл аппликэйшн болон тухайн сургуулиуд дээр бүртгэлийн комисс ажиллаж байгаа.