17/12/2021 Галуут суманд иргэдийн оролцоотой “Сумын төвийн шинэчлэл” төслийг энэ оноос хэрэгжүүлж байна.

Энэ хүрээнд сумаа тэлэх зорилгоор шинээр газар эзэмших хүсэлтэй 75 өрхийн өргөдлийг үндэслэн, цэвдэгтэй бүсийн цэгээс зайдуу гурван гудам бүхий 50 айлын хашааг нэг стандартаар байгуулж /сумын 22 иргэнийг ажлын байраар хангаж хариуцуулан гүйцэтгүүлсэн/ өрхүүдэд олгожээ. Мөн тус суманд цэвэр ус, дулааны шугам сүлжээ 1.5 км-т тавиад байгаа аж.

Сумын хэмжээний зургаан багт тариалангийн хашаа, мал угаалгын ванныг байгуулж суурилуулсан бол сурагчдын Үдийн цайг үдийн хоол болгосонтой холбогдуулан 17.5 сая төгрөгийн үнэ бүхий 13 нэр төрлийн хоолны багаж тоног төхөөрөмжтэй болжээ.

Сумын төвийн хогийн цэгийг цэгцэд оруулж, далан босгон хөрсний бохирдол үүсэхээс хамгаалсан зэрэг ажлуудыг хийж гүйцэтгээд байгаа бол “Сумын төвийн шинэчлэл” төслийн хүрээнд ирэх онд ногоон байгууламж, зам талбай, 2 цэцэрлэгт хүрээлэн, тохижилт дэд бүтцийн ажил үргэлжлэн хийгдэж айл өрх, албан байгууллагуудаа төвлөрсөн системд холбохооор төлөвлөжээ.

Түүнээс гадна 27, 14 айлын орон сууц, Ахмадын сувилал байгуулах зэрэг ажлуудыг ар араас нь шат дараатай хэрэгжүүлэхээр төлөвлөөд байгаа юм.