"Монгол бахархлын өдөр"-ийн хүрээнд Чингис хааны үйл хэргийг алдаршуулах үйл ажиллагааг Баянхонгор аймгийн Өлзийт сумын Ерөнхий боловсролын "Сайн оюут" сургууль зохион байгуулж байна.

Үйл ажиллагааг 11 дүгээр сарын 18-24-ний хооронд зохион байгуулж байгаа бөгөөд бага ангийн сурагчдыг хамруулж байгаа аж. Тодруулбал, 1-2 ангийн сурагчид түүхэн сэдэвт шүлэг, 3-4 дүгээр ангийн сурагчид түүхэн сэдэвт дуу, 5 дугаар ангийн сурагчид түүхэн сэдэвт яруу найраг, бүжгээс сонгон анги хамт олноороо сурч, видео бичлэг хийн олон нийтэд түгээжээ.

Тус үйл ажиллагаанд сурагчид маш идэвх зүтгэл, санаачилгатай оролцож байгааг багш нар хэлж байна. Мөн хугацаанд Эзэн Чингис хааныхаа талаар ном зохиол уншиж, эцэг эхээсээ мэдэж судалснаа ангийнхандаа ярьж түгээх тусгай цагийг бий болгожээ.

"Монгол бахархлын өдөр"-ийн хүрээн дэх тус үйл ажиллагаа нь төрт ёсны үнэт өв, үндэсний уламжлал, Эзэн богд Чингис хааны суу алдар, аугаа их түүхэн үйл хэргийг сурвалжлан судалж, алдаршуулан мөнхжүүлэн сурталчлах түгээн дэлгэрүүлэхэд оршиж байна.