"Цагаан сар 2023" үзэсгэлэн худалдаанд найман сумын 90 иргэн ААН оролцож, 130 гаруй сая төгрөгийн борлуулалт хийсэн байна.

Цагаан сарын баярыг тохиолдуулан орон нутгийн бичил, жижиг, дунд үйлдвэр, үйлчилгээ эрхлэгчдийн үйлдвэрлэсэн бараа, бүтээгдэхүүний борлуулалтыг нэмэгдүүлэх, зах зээлд таниулан сурталчлах, үйлдвэрлэгч хэрэглэгчдийг холбох зорилгоор зохион байгуулсан тус үзэсгэлэн худалдаа энэ сарын 11-14-ний хооронд дөрвөн өдөр үргэлжилсэн.

Энэ жилийн үзэсгэлэнгийн онцлог нь хүнс бус бараа бүтээгдэхүүн /дээл, малгай, гутал, бүс/ голчилсон, тэр дундаа давсан урлалын бүтээлүүд зонхилсон байснаараа онцлог байв. Мөн гэгээн хайрын баяртай холбоотой бэлэг дурсгалын зүйлс, зүрхэн бялуу, зүрхэн шоколад зэргийн худалдаа үзэсгэлэнгийн чимэг болсон юм.

Ийнхүү зохион байгуулагчид бараа бүтээгдэхүүний борлуулалт, хэрэглэгчдийн эрэлт хэрэгцээ зэргийг үнэлэн үзэсгэлэнгийн шилдгүүдийг тодруулахад,

- Хүнсний салбарын шилдгээр "Арвин хүнс" цех Р.Энхболд

- Хөнгөн үйлдвэрийн салбарын шилдгээр Гутал үйлдвэрлэгч төсөл хэрэгжүүлэгч Б.Мэндсайхан

- Газар тариалангийн салбарын шилдгээр Чацарганаар төрөл бүрийн бүтээгдэхүүн үйлдвэрлэгч Л.Лхамхүү нар шалгарсан байна.

Сонирхуулахад, Үзэсгэлэн худалдааны бараа бүтээгдэхүүнүүдийн үнэ ханшийн тухайд, өмнөх оны мөн үеийнхээс 4-10 хувиар нэмэгдсэн дүнтэй байв.