Баянхонгор аймгийн Эрдэнэцогт сумын зургадугаар багийн тариаланч Ц.Ганбат, түүний гэргийг Д.Цэцэнбилэг нар газар тариалангийн салбарт олон арван жилийн хөдөлмөр бүтээлээ зориулж ирсэн амжилтаа үнэлүүлж усан туулай жилийн "Улсын аварга тариаланч"-аар шалгарчээ.

     Улсын аварга тариаланчийн шагналыг Засгийн газрын гишүүн, Гадаад харилцааны сайд Б.Батцэцэг, УИХ-ын гишүүн Г.Ганболд, Баянхонгор аймгийн Засаг дарга Д.Мөнхсайхан, аймгийн ХХААГ-ын дарга У.Балжинням нар өнөөдөр гардуулав. Шагнал гардуулах бүрэлдэхүүнд Эрдэнэцогт сумын ИТХ-ын дарга Б.Энхбаатар, Засаг дарга Д.Цэвэгдорж нар багтав.

    Улсын шинэхэн аварга тариаланч энэ гэр бүлийнхэн газар тариалангийн салбарт 40 орчим жилийн үйлсээ зориулж яваа бөгөөд зөвхөн усан туулай жилд гэхэд түр ажлын байраар 20 гаруй иргэнийг ханган, 200 гаруй тонн ургац хураан авчээ.

Баяр хүргэе. Сар шинэдээ сайхан шинэлээрэй.

 

 

БАЯНХОНГОР АЙМГИЙН ЗАСАГ ДАРГЫН ТАМГЫН ГАЗАР

2024 оны 02 дугаар сарын 04-ний өдөр