Модон луу жилийн босгон дээр Баянхонгор аймгаас улсын аварга малчин эрхэм алдар цолыг арван малчин, хошой аварга малчин нэг, аварга тариаланч нэг, аварга саальчин нэгээр нэмэгдэн сар шинийн өмнө шагналаа гардан авч байна.

     2018 онд Улсын аварга малчин болсон Баянхонгор сумын Гэгээн шавь 6-р багийн малчин Даржаагийн Батсүх аваргаа баталж, зургаан жилийн дараа улсын хошой аварга хэмээх цол хүндийг хүртэн Монгол улсын Засгийн газрын гишүүн, Гадаад харилцааны сайд Б.Батцэцэг, УИХ-ын гишүүн Г.Ганболд, аймгийн Засаг дарга Д.Мөнхсайхан нараас шагнал, үнэмлэх цол тэмдгээ гардан авлаа.

     Шагнал гардуулах бүрэлдэхүүнд АЗДТГ-ын дарга Д.Энхжаргал, Баянхонгор сумын ИТХ-ын дарга С.Батцэрэн, Засаг дарга Г.Энхбаяр, сумын орлогч дарга Д.Ууганцэцэг, ХХААГ-ын дарга У. Балжинням нарын удирдлага хамт олон, ХДТ-ын уран бүтээлчид багтав.

     Улсын хошой аварга малчин Д.Батсүхийнх Өлзийт сумын Баруун зуухны өвөлжөө буюу Бүлээний фермдээ өнтэй сайхан өвөлжиж байна.

    Эцэг өвөгдөөс уламжлан ирсэн арга ухаанаа өнөө үеийн олон арга ажиллагаатай хослуулан нүүдлийн мал аж ахуйн тогтвортой хөгжилд анхааран, үржил шимийг сайжруулж, мал сүргээ таван төрөл дээр нь чанаржуулж, өсгөж ирсэн амжилт бол гэргий Э.Норжмаатай нь салшгүй холбоотойг улсын хошой аварга Д.Батсүх энэ үеэр онцолж байв.

    Гурван сайхан хүүхэдтэй энэ гэр бүл нийгмийн хариуцлагын хүрээнд олон залуу айл өрхийг малчнаар бэлтгэж, тусад нь гаргаж дэмжиж ирэхдээ аймаг орон нутгаас явуулж буй аливаа бодлого арга хэмжээг ямагт дэмжиж оролцдог, үлгэр жишээч айл ажээ.

   Улсын аварга малчин алдар хүндээ түмэн олондоо батлан харуулж улсын хошой аварга малчин болсон танай гэр бүлд баяр хүргэе. Сайхан шинэлээрэй.

 

БАЯНХОНГОР АЙМГИЙН ЗАСАГ ДАРГЫН ТАМГЫН ГАЗАР

2024 оны 02 дугаар сарын 04-ний өдөр