Монголын уламжлалт сар шинийн баяраар ХХААЯ, МҮОНР-гийн “Таван эрдэнэ” нэвтрүүлгийн нэрэмжит “Алтан төлийн эзэд”-ийг тодруулдаг. Өнөө жил Баянхонгор аймгаас Алтан тугал, Алтан унага, Алтан хурга, Алтан ишигний эзэд төрсөн бөгөөд 2024 оны 2-р сарын 18-ний өдөр Аймгийн ИТХ-ын төлөөлөгч Б.Энхтүвшин, Т.Хишигбаатар болон сумын удирдлагууд Алтан ишигний эзэн болох Ц.Нямдоржийн шагналыг гардуулав.

   Энэхүү шагналын гол шалгуур нь тухайн жилдээ хамгийн олон төл хүлээн авсан, нутаг орондоо шинэ залуу малчин бэлтгэхэд анхаарсан, малчдыг ажлын байраар хангасан байдал, малынхаа ашиг шимийг боловсруулж зах зээлд гарган өрхийн үйлдвэрлэлээрээ бусдад үлгэр жишээ болохуйц ажилласан, малчдын бүлэг хоршоо, нөхөрлөл хамтын ажиллагаанд хэрхэн санаачилгатай ажилласан зэрэг үзүүлэлтийг хангасан байх юм.

   Алтан ишигний эзэн Ц.Нямдорж, Н.Алтан нар нь 2000 оноос эхлэн мал маллахдаа ашиг шимийг дээшлүүлж, нутгийн шилмэл омгийн малыг өсгөн үржүүлж байгаа юм байна.

 

БАЯНХОНГОР АЙМГИЙН ЗАСАГ ДАРГЫН ТАМГЫН ГАЗАР