БНХАУ-ын Жючуань хот болон Баянхонгор хот хоорондын хамтран ажиллах найрамдлын гэрээний хүрээнд энэ оны 05-р сараас 500 сая төгрөгийн өртөг бүхий нарны эрчим хүчний хүлэмжийн төслийг манай аймагт эхлүүлж, 50х8м-ийн хэмжээтэй, автомат усалгааны систем бүхий хоёр хүлэмжийг барьж ашиглалтад орууллаа. Уг хүлэмжид анхны тариалалтыг хийж, өргөст хэмхийн үрийг суулгаад байгаа юм.

Жючуань хотын Дуньхуан хотын ХАА-н технологийн төвийн агрономич Ван Хай уг ажлыг ахалж өвлийн хүлэмжийн түлхүүрийг Баянхонгор сумын Засаг дарга бөгөөд хотын захирагч Г.Энхбаярт /2024.07.21/ хүлээлгэн өгөв.

2023 онд зуны 100 ширхэг хүлэмжийг нэг дор, Шинэ суурьшлын бүсэд хоёр өвлийн хүлэмжийг Баянхонгор аймаг тус тус байгуулсан бол энэ удаа БНХАУ-ын Жючуань хотын дэмжлэгтэйгээр дахин хоёр өвлийн хоёр хүлэмжтэй болж иргэдээ ажилтай орлоготой байлгах, эрүүл хүнс хэрэглэх бодлогоо амжилттай хэрэгжүүлж, жилийн дөрвөн улиралд хүнсний нарийн ногоогоо өөрсдөө тариалах боломжийг нэмэгдүүлсээр байна.