Монгол Улсын Бүсчилсэн хөгжлийн үзэл баримтлал, Засгийн газрын 2024-2028 оны үйл ажиллагааны хөтөлбөр, “Хурдтай хөгжлийн төлөөх зориг” хамтарсан Засгийн газрын гэрээний хэрэгжилтийг эрчимжүүлэх, Бүс орон нутгийн бие даасан байдлыг бэхжүүлэх зорилгын хүрээнд “Хангайн бүсийн зөвлөл” анхдугаар хуралдаан эхэлж байна.

Архангай аймагт болж буй тус хуралдааны хүрээнд таван салбар хуралдаан өрнөх бөгөөд

• Хангайн бүсийн хөгжлийн төлөвлөгөө,

• Хангайн бүсийн тэргүүлэх төслүүд,
• Хангайн бүсийн зөвлөл, засаглал, эрх зүйн орчин
• Бүсийн онцлог, тэргүүлэх чиглэл
• Амьдралын чанар, тулгамдсан асуудал зэрэг олон талт асуудлыг хэлэлцэх юм.

Хуралдаанд Архангай, Баянхонгор, Өвөрхангай аймгийн төр, хувийн хэвшил, иргэний нийгмийн байгууллагын төлөөлөл болон бүсээс сонгогдсон УИХ-ын гишүүд, Монгол Улсын Засгийн газрын гишүүд оролцож, Хангайн бүсийн хөгжлийн гарц шийдлийг хэлэлцэнэ. Ингэснээр бүс нутгийн хөдөлмөр эрхлэлтийг дэмжиж, орон нутагт ажиллаж, амьдрах, бизнес эрхлэх таатай нөхцөлийг бүрдүүлэх, Бүс дамнасан, салбар хоорондын уялдааг хангасан стратегийн төслүүдийг үе шаттайгаар хэрэгжүүлэхэд шаардлагатай бодлого, шийдвэр гаргахад дөхөм болно.

Монгол Улсын Шадар сайд С.Амарсайханы тушаалаар бүс нутгийн хөгжлийг дэмжих талаар төрөөс баримтлах бодлогыг хэрэгжүүлэх ажлыг зохион байгуулах, бүсийн нийгэм, эдийн засгийн хөгжлийн асуудлыг зохицуулах чиг үүрэг бүхий “Бүсийн зөвлөл”-ийн дарга нар томилогдож байгаа аж. “Бүсийн зөвлөлийн анхдугаар хуралдаан”-ыг бүс тус бүрээр зохион байгуулахаар төлөвлөж байгаа бөгөөд бүсийн зөвлөлийн даргыг аймгуудын нэрний цагаан толгойн үсгийн дарааллаар сонгохоор тогтсон. Уг заалтын дагуу Хангайн бүсийн зөвлөлийн даргаар Архангай аймгийн Засаг дарга ажиллахаар болжээ.

1. Хангайн бүс: УЛАМЖЛАЛТ МАЛ АЖ АХУЙН ТӨРӨЛЖСӨН, ХОТ БАЙГУУЛАЛТЫН ДЭД БҮС
2. Баруун бүс: ЭРЧИМ ХҮЧНИЙ ТӨРӨЛЖСӨН, БАЙГАЛИЙН АЯЛАЛ ЖУУЛЧЛАЛЫН ДЭД БҮС
3. Хойд бүс: БАЙГАЛИЙН АЯЛАЛ ЖУУЛЧЛАЛЫН ТӨРӨЛЖСӨН, АЖ ҮЙЛДВЭРИЙН ДЭД БҮС
4. Төвийн бүс: ХӨДӨӨ АЖ АХУЙН ТӨРӨЛЖСӨН, АЖ ҮЙЛДВЭРИЙН ДЭД БҮС
5. Зүүн бүс: ТҮҮХЭН АЯЛАЛ ЖУУЛЧЛАЛЫН ТӨРӨЛЖСӨН, ЭРЧИМЖСЭН ХӨДӨӨ АЖ АХУЙН ДЭД БҮС
6. Говийн бүс: АЖ ҮЙЛДВЭРИЙН ТӨРӨЛЖСӨН, НОГООН ЭРЧИМ ХҮЧНИЙ ДЭД БҮС
7. Улаанбаатарын бүс: ОЛОН УЛСЫН БАНК, САНХҮҮ, БИЗНЕСИЙН ХӨГЖЛИЙН БҮС НУТАГ гэж тус тус тодорхойлсон.

 

Бүсчилсэн хөгжлийн бодлогын хүрээнд “Хангайн бүс”-ийн тэргүүлэх чиглэл нь төрөлжсөн аялал жуулчлал, тодруулбал соёлын, түүхэн, адал явдалт, байгалийн, амралт, рашаан сувилал, суурилан хөгжүүлэх зорилт тавин ажиллаж байна.