Шинэжинст сумын иргэдийн нэн тулгамдсан асуудлуудын 1 нь ундны усны чанар, хүртээмж байдаг.

Мөн сумын гол байгууллагууд өнөө хэр модон жорлонтой байгаа, хүүхдүүд өвлийн хүйтэнд гадаа гарч бие засдаг асуудлууд бий. Баянхөндий төслөөс нийгмийн хариуцлагын хүрээнд юун түрүүнд Шинэжинст сумын эдгээр асуудлуудыг шийдвэрлэхийг зорьж, түрүүчээсээ мэргэжлийн багийнхан газар дээр нь хэмжилт, судалгаа хийн, ажиллаад эхэлжээ.

Газар дээр нь танилцахад, сумын ундны усны үүсгүүр худгууд бүгд хуучирч элэгдсэн, Мэргэжлийн хяналтын шаардлага хангахааргүй бохирдсон, өвөлдөө хөлддөг гэх мэт асуудлуудтай байна. Мөн сумын гол байгууллагуудын ариун цэврийн байгууламжуудын холболт дутуу, усны хангалт байхгүй, эвдрэлтэй зэргээс одоо хэр ашиглах боломжгүй байдаг аж.