Баянхонгор аймагт холимог тулааны спортын “Нөхөрлөл-BMMA-Fighting” клуб 2023 онд байгуулагдаж тус спортод дуртай, сонирхогч хүүхэд залуусыг хичээллүүлж эхэлсэн. Уг клубын үйл ажиллагаанд Баянхонгор аймаг, сумын Гэмт хэргээс урьдчилан сэргийлэх ажлыг зохицуулах салбар зөвлөлүүдээс хүүхэд, залуусыг спортоор дамжуулан зөв, өв тэгш хүмүүжилтэй болгох зорилгоор дэмжлэг үзүүлж хамтран ажилласан.

Тус клубын тамирчидаас 2024 оны 03, 04 дүгээр сард Улаанбаатар хотод зохион байгуулагдсан Улсын аварга шалгаруулах тулааны “УШУ-САНДА”, боксын “MUAYTHAI” тэмцээнүүдэд тамирчин Ө.Золбообаяр 17 насны ангилалд оролцож тус бүр тэргүүн байр эзэрж “Алтан медаль”, Улсын аварга шалгаруулах “КИКБОКС”-ын тэмцээнд тамирчин Г.Нэмэхбаяр, Н.Доржсамбуу нар 16 насны ангилалд оролцож жин тус бүртээ “Хүрэл медаль” хүртсэн амжилт гаргажээ.

Тамирчдыг клубын багш, дасгалжуулагч О.Дондов бэлтгэн уралдаан тэмцээнд оролцуулж дээрх амжилтыг гаргалаа.

Тэмцээнд оролцсон багш, дасгалжуулагч болон тамирчдыг аймгийн иргэдийн Төлөөлөгчдийн Хурлын нарийн бичгийн дарга Т.Норов, аймгийн Гэмт хэргээс урьдчилан сэргийлэх ажлыг зохицуулах салбар зөвлөлийн нарийн бичгийн дарга Ж.Наранбаатар нар хүлээн авч хүндэтгэл үзүүллээ.